Soengqfangz
Soengqfangz《送鬼》
gaijMbanj gou dwg aen mbanj Bouxyauzcuz， ndaw mbanj miz haujlai vunz saenq fangz。Gou mbouj saenq， gij vunz haenx couh yienghneix haep naeuz： Mbouj saenq rox dai vunz hw。Gou caiq mbouj saenq， gij vunz haenx youh gangj song gienh saeh lajneix：
Miz haemh he， mbwn laepngaungau。 Ndaw singz miz boux swhgih mbouj saenq fangz he， de haici gvaq dieg moek vunzdai， dieg neix cungj dwg moek boux laeghoz、diuqdah dai，vunz naeuz dieg neix miz fangz。 Boux swhgih haenx haici gvaq dieg neix seiz， dingqnyi henz loh miz lwgnyez daej。 De roengz ci bae yawj， raen miz boux lwgnyez bi lai hung ndeu ninz youq henzloh。Boux swhgih umj lwgnyez haenx hwnj ci， cuengq de youq henz ndang couh haici ma ranz。 Hoeng gvaq cib lai faen cung le， lwgnyez haenx mbouj raen lo。 Boux swhgih neix ma ranz le， haemh haenx ninz couh lumj deng fangz hwnjndang nei luenh heuh， gvaq song ngoenz de couh dai youq gwnz mbonq lo……
Youh miz ngoenz he， ndaw mbanj miz boux mbouj saenq fangz he bae ndoi， de youq gwnz ndoi raen miz duzbit he。 Caen geizheih lo， ndaw ndoi baelawz miz duzbit okdaeuj？ De siengj gaeb duzbit ma ranz， hoeng duzde deuz gig vaiq gaeb mbouj ndaej。 Boux neix ma ranz gvaq ndaej geij ngoenz， couh sikhaek bingh dai lo……
Raen dai luba， mbouj saenq fangz couh rox dai vunz。 Hoeng， mboujguenj vunz ndaw mbanj baenzlawz gangj baenzlawz haep， gou ciuqyiengh mbouj saenq。
Duzfangz dwg baenzlawzyiengh？ Vunz mbanj gou mboujmiz bouxlawz raen gvaq， engq mboujmiz bouxlawz gaeb ndaej gvaq。 Hoeng danghnaeuz miz vunz baenzbingh， youh aeu cingj bouxdauh soengqfangz。Gou dajiq couh raen gvaq bouxdauh soengqfangz， daj iq couh rox soengqfangz dwg yaeuh vunz， bouxhuk bouxngunh cij saenq de。Lajneix gou lwnh mwngz dingq soengqfangz dwg baenzlawz yaeuh vunz。
Bi 1975 nienz， gou lij doeg siujyoz， seizhaenx bouxboux mboujmiz gwn， haeux cungj gwn mbouj imq， gaej gangj gwn noh lo。 Ngoenz he， gou bae hagdangz， bungzraen goengdauh ndawmbanj？ okdou。 De naeuz bae aen mbanj Bouxgun bang vunz soengqfangz， cam gou gaen bae lwi， bae couh ndaej gwn nohgaeq bw。 Gou dingqgangj miz nohgaeq gwn，couh ndwnj myaiz byoegbyoeg， mbouj guhsing gaen de bae lo。
Gou diuqleklek gaen goengdauh byaij cib lai leix loh， daengz aen mbanj Bouxgun haenx。 Vunz Mbanjgun neix cungj maij heuh goengdauh daeuj guhdauh， aenvih goeng de youq aen yangh dou gig mizmingz， Mbanjgun Mbanjcuengh cungj saenq de guhdauh lingz gvaqmaz。 Baezneix bae ranz Bouxgun haenx，dou ngamq haeuj dou couh raen ranz de cwng haeuxnaengj， haeuxnaengj rangfwdfwd， ndaw rek lij dumq duz gaeqiem hung， gou geijlai nanz mbouj ndaej gwn nohgaeq lo，seizneix caen dwg？ haexgaeq cungj siengj gwn bae。
Goengdauh raen gij yiengh gou yakyawj lai， couh aeu Vahyiuz lwnh gou：“ Lwgningq ha， caj yaephe couh ndaej gwn gagaeq lo。” Vunz seizdaih neix mboujrox lw， youq aen seizdaih haenx， bi daengz byai mboujmiz noh gwn， aeu daengz cieng cij ndaej gwn bya gwn noh， bouxlawz raen nohgaeq mbouj dwg iek dai iek lix ne？
Ranz Bouxgun haenx mbouj rox dingq Vahyiuz， baz ranz de raen goengdauh dwggyaez gou，couh nyaenj ndaek haeuxnaengj hawj gou gwn gonq。
Seizneix， goengdauh guhdauh soengqfangz lo。 De dawz fag cax okdaeuj，itmienh aeu cax “bag fangz”， itmienh bak nambwdbwd。
Goengdauh dwg nam Vahyiuz ， vunz Bouxgun dingq mbouj rox， gou dingq de yienghneix nam： Boux ranzcawj neix bae gwnz ndoi aeu fwnz， bungqraen duz ngwzsonggyaeuj he， duz ngwz haenx dwg “duzfangz”， duzfangz hwnjndang yaek aeu mingh bouxcawj ranz neix， de couh baenzbingh lo……
Goengdauh yied nam sing yied hung， fagcax hix yied bag yied okrengz， lumj caeuq duzfangz doxmoeb doxgaj， aeu gaj dai duzfangz 。 Gou yawj gij yiengh neix lau yaek nyouh conh， siengj gag diuz baema lo。
Sawqmwh， goengdauh lumj boux fatbag nei swenj hwnjdaeuj：“Fagcax raeh lai！Duzgaeq biz dai！Vujvuj……”
Ae？ De dwg gangj“ Fagcax raeh lai！Duzgaeq biz dai？” Dwg rwz gou okrumz dingq loek luba。 Goengdauh seizneix “soengq fangz” gvaq henzndang gou， de yaepda “lwnh” gou geij guhsing。
Soengq duzfangz “okdou” le， goengdauh dawz ga’gaeq hawj gou gwn ……
Dauq ma ranz daengz buenq loh， gou cam goengdauh vihmaz soengqfangz aeu gangj “Fagcax raeh lai！Duzgaeq biz dai”？ Goengdauh riuhaha naeuz： “ Mwngz raen fagcax gou raeh lwi？ Duzgaeq haenx biz lwi？ Gou gangj ndaej doiq ha……”
Goengdauh raen gou lumj dingq mbouj rox， couh gangj naeuz： “Lwgningq ha， gou guh neix dwg ra donq ngaiz gwn， bungq ndei lij ndaej gwn nohgaeq dem。”
Gangj hwnjdaeuj gig geizheih， ranz Bouxgun haenx guhdauh gvaq le， ngoenz daihngeih bouxcawjranz mizbingh haenx bingh ndei bae guhhong lo。
“Goengdauh Bouxyauzcuz neix ak lai lo，gijmaz fangz bungq daengz de cungj deuz daengz raem doek！” Yienghneix boux lwnh boux，vunz Mbanjgun
Mbanjcuengh engq fug goengdauh neix lo。
Daj baezhaenx gvaq le， gou youq rog bungqraen goengdauh， de itmienh riu itmienh sing iq caeuq gou gangj： “Fagcax raeh lai！Duzgaeq biz dai！”？Gou sikhaek singsang han naeuz： “Vujvuj……”