Cuenghhag：修订间差异

'''Cuenghhag''' (Cang’yoz ; [[Sawgun]]: 壮学; Bingqyaem: Zhuàngxué) dwg monz yozgoh aeu [[Bouxcuengh]] daeuj guh yenhgiu duisieng he. De dawz Bouxcuengh aen minzcuz neix guhbaenz aen cingjdij ndeu daeuj gaujcaz, yenhgiu Bouxcuengh gij lizsij caeuq vwnzva gijyenz、bencenh、fazcanj gocwngz de, yenhgiu Bouxcuengh youq fazcanj gyaeraez ndawde caemdingh gij vuzciz vwnzva、cingsaenz vwnzva caeuq cidu vwnzva gij nei’hanz、dwzcwngh、gunghnwngz caeuq fazcanj gveihliz de,yenhgiu Bouxcuengh sevei、cunghgyau、ginghci、gyauyuz、sinhlij、swnghdai、gohgi doengh gij fuengfueng mienhmienh neix. De dwg Yinzvwnz sevei gohyoz ndawde monz yozgoh doglaeb he,miz gij daegdiemj cunghhozsing caeuq gyauhcahsing de.

 

Cuenghhag gij yenhgiu neiyungz de gvangq dangqmaz, sezgiz daengz [[Bouxcuengh]] gij lizsij、yijyenz、cunghgyau、vwnzva、ginghci、vwnzyoz、yisuz、gyauyuz、cezyoz、minzsuz、sinhlij、yihyoz、gohgi、sevei sujsiz、sevei bencenh caeuq diegcuengh yendaiva gocwngz ndawde daez okdaeuj gij lijlun vwndiz caeuq sizcenj vwndiz de, gij yenhgiu fanveiz de hamjgvaq yinzvwnz gohyoz、sevei gohyoz caeuq mbangj swyenz gohyoz lingjyiz, goj naeuz Cuenghhag bauhamz liux [[Bouxcuengh]] sevei gij swnghcanjliz caeuq swnghcanj gvanhhi、ginghci gihcuj caeuq baihgwnz gencuz sojmiz neiyungz. Neix baez ding’yi le gangjmingz, Cuenghhag cix dwg gvendaengz gij yozvwn Bouxcuengh caeuq gij cihsiz dijyi gag doglaeb de, caemh eiqhoz naeuz Cuenghhag bauhamz miz song daih yenhgiu cujdiz, it dwg gvendaengz Bouxcuengh gij lizsij caeuq vwnzva yenhgiu; ngeih dwg Bouxcuengh yendaiva yenhgiu. Duenh seizneix Cuenghhag yenhgiu lij aeu gij baihnaj guhcawj, dinglai yawjnaek Bouxcuengh gij lizsij、vuzciz vwnzva caeuq cingsaenz vwnzva yenhgiu.